通天波男2.0 寸王肥賓不懂撒嬌的領隊

作者:Frederica    發表日期:2017-06-02 05:51:01

港男港女,係永恆不止、講之不厭嘅網上話題。港女周時被標籤為強悍、寸嘴、「不懂撤嬌」,令男士終日頭耷耷、眼濕濕,冇晒自信自傲英雄感,如果有得揀,就必揀台妹或內地女士咁話。波男年紀唔細,打打殺殺就唔好預我喇;大家不如好好諗吓自己真正需要,搵個適合嘅人,好過捕住討論區嗌到拆天。

公仔箱有《不懂撤嬌的女人》,球壇就有《不懂撤嬌的領隊》,每日全球無間上演。撤嬌係門溝通藝術,適當利用可氹到人心花怒放;呢門學問,適用於一切人與人之間嘅關係。要做一個成功嘅領隊,面對球會老細,除需獻上實績外,大家和顏悅色萬事有商量,份工先會做得長。領隊仲要服侍旗下球員,同每一個嘅關係都要小心處理,唔係死咗都唔知乜事。

莫連奴可算係不懂撒嬌嘅表表者。寸王對旗下所有戰將,都有嗰句講嗰句,佢一向認為球員已經擁有太多,盲目護短並冇好處。咁諗係冇錯,但本季無論上至伊巴謙莫域、米希達利恩,下至菲爾鍾斯、勞基梳爾,寸王都選擇「公開批評」,咁做只會破壞雙方關係。12年佢帶領皇馬破贏波紀錄奪取西甲冠軍,第二年就要走人,就係因為曾公開批評C朗,又同卡斯拿斯、沙治奧拉莫斯鬧翻。唔係話球星啱晒大晒,但莫連奴對待一班大帝嘅手腕,絕對有改善空間。

賓尼迪斯可謂另一個人辦;呢位曾帶領利物浦勇奪歐聯冠軍嘅名帥,不嬲勁愛紅軍,於離任後依然極度關注希斯堡球場慘劇可見一斑。但佢只視球員為棋子,私底下完全冇接觸,謝拉特就話過,同所有合作過嘅領隊都可以通電話,唯獨同肥賓冇偈傾。領隊同球員,的確可以只係互惠互利嘅專業合作,但缺乏心靈溝通嘅機械式「主僕關係」,喺足球呢項重視血性、士氣嘅運動入面,似乎並唔係周時行得通。喺肥賓執教之下,紅軍實力的確係有所提升,但最後始終同英超冠軍無緣,或者賓尼迪斯嘅孤高,就係利物浦只差一點點嘅關鍵。

當然,一段關係Work唔Work,淨係識撒嬌係唔夠,等於一個女人「呢刻嗲到你暈、下一刻就搵你笨」嘅話,都會畀人一腳踢去大西洋。不過,如果成功升到「撒嬌值」點都冇壞,領隊適當時候,對老闆球員球迷加番幾滴潤滑油,架車點都Run得順啲,揸多兩年冇咁頻能吖嘛!

東網體育同你追實體壇每個精彩時刻! 
http://bit.ly/2ecTF2A 


本文来源:http://hk.on.cc/hk/bkn/cnt/sport/20170505/bkn-20170505080400732-0505_00882_001.html

本文固定鏈接: http://www.makeup-time.com/10260.html
轉載請注明:Frederica 2017-06-02 05:51:01 於 綜合資訊站 發表

上一篇: :下一篇
返回頂部