政Whats噏:卿姐驚「剝光豬」畀人睇曬?

作者:Lillian    發表日期:2018-05-27 16:40:17

畀人「剝光豬」睇全相當然個個都唔想,但因乜事前立法會議員劉慧卿(卿姐)今日 (24日)咁高調講唔想?唔通佢最近畀人「剝光豬」?原來係因近年成日都講創科,FinTech(金融科技)、電子支付等都話要收集大數據,分析每個市民嘅日常生活習慣同行蹤,結果啲個人資料畀人掌握得一清二楚,咁卿姐咪覺得冇曬私隱,好似「剝曬衫畀人查」咁囉!

個人資料私隱專員黃繼兒話呢個比喻已經有人提出過,仲直認個情況「真係好似剝光豬」咁,咁到底市民係咪唔會再有私隱?黃繼兒就話,顧及社會經濟發展、發展智慧城市、市民生活便利程度等方面,的確需要分析大數據,但佢作為私隱專員,都希望可以幫市民「適當地着返啲衫」。

黃繼兒話要推動營運商、發展商做良心企業,唔好每次洩漏咗資料,先至後知後覺咁亡羊補牢,一早做好啲預防措施就最好,而佢哋亦都會研究嚇係咪應該修例,加大個人資料私隱專員公署嘅權力,同時加重罰則,以加強阻嚇力。不過黃都補充話,最緊要係市民,特別係年輕人睇清楚啲條款,唔好乜都唔睇就同意就最好喇!


本文來源:http://hk.on.cc/hk/bkn/cnt/news/20180424/bkn-20180424173316589-0424_00822_001.html

本文固定鏈接: http://www.makeup-time.com/111842.html
轉載請注明:Lillian 2018-05-27 16:40:17 於 綜合資訊站 發表

上一篇: :下一篇
返回頂部