一念天堂一念地獄 朗尼何去何從?

作者:Wanda    發表日期:2017-06-03 12:26:01

香港人幾時都係睇人PK最開心,睇到人出醜出軌乸手唔成勢,就Blue Monday都變Happy Friday。波男都係正常香港人,話冇咁嘅嗜好就假,但呢兩日見到朗尼「入定」條片,就算一向對月巴同曼聯冇好感,講真都笑唔出。

多得曼聯放棄英超,上輪作客熱刺場聯賽,朗尼終於戴番個隊長臂章打正選。喺球員通道等出場嗰陣,電視鏡頭影住朗尼,佢唔單只冇龍精虎猛精神抖擻預備殺敵,反而成個呆晒毫無表情、雙眼零焦點望向遠方,成十幾秒都冇眨過眼。波男睇港產殭屍片、恐怖片睇到大,見到咁嘅畫面,第一時間係諗:佢係咪撞咗邪?定係畀污糟嘢上咗身?

對一個男人嚟講,最緊要係咩先?答案不離錢同女人,但當你賺300萬港紙一個禮拜、有個美滿家庭有兩個寶貝仔,事業上有滿足感都好重要。月巴04年入魔後,總共為曼聯攞過5次英超同1次歐聯冠軍,強如C朗,當年都恰唔到朗尼。月巴過後仲做埋英格蘭隊長,喺紅魔做山寨王、風頭躉,都幾過癮㗎。

但幾鋒利嘅刀,都會有生銹嘅一日,只係諗唔到朗尼咁快就回塘。近2季瘋狂跌Watt,到莫連奴入魔後更加冇掟企做後備,成季最叻仔,就係超越卜比查爾頓做曼聯史上入球王,但除此之外,都係畀魔粉鬧完又鬧,叫佢嗱嗱臨爛屍趷路。

做人總不能日日提舊時,舊屎舊屎,一早沖走咗啦。此處不留人,大把留人處,依家朗尼最緊要揀過主好人家,搵間合適嘅新球會。唔少中超球會,開到成100萬鎊周薪等緊佢添,雖然魔粉不嬲都插佢見錢開眼,但朗尼對足球事業應該仲有團火,依家去中超似乎太早。

計波男話,朗尼最好學費蘭度托利斯咁重返母會,由頭再嚟過。王子返到馬體會就算弗唔番晒,但總算抬得起頭做人;早前愛華頓領隊朗奴高文話過,歡迎朗尼回歸,有佢在陣拖肥糖肯定升呢。朗尼只係31歲,喺娘家大有機會鹹魚翻生,出年世界盃年,月巴分分鐘仲有得入選。成事在人,朗尼如果仲有心發奮圖強,肯定冇咁易收檔。


本文来源:http://hk.on.cc/hk/bkn/cnt/sport/20170519/bkn-20170519020020751-0519_00882_001.html

本文固定鏈接: http://www.makeup-time.com/12098.html
轉載請注明:Wanda 2017-06-03 12:26:01 於 綜合資訊站 發表

上一篇: :下一篇
返回頂部