棄巨額合約!男神費托博盡露點踩入Model界

作者:Estelle    發表日期:2017-06-16 09:02:07

球季完結,家陣唔少球星都傾緊轉會尋求新發展,好似馬德里體育會嘅前鋒費蘭度托利斯都一樣,呢位今夏約滿嘅西班牙球星,近期一直同墨西哥球會克雷塔羅扯上關係,有傳對方開出一紙20萬鎊周薪合約吸引佢加盟。本來呢份巨額合約,對於成33歲、就快去到球員生涯尾聲嘅費托嚟講,肯定極為吸引,不過,原來「王子」心目中已有新計劃,就係續約馬體會,然後方便發展佢嘅模特兒事業。今晨荷蘭潮流品牌BALR就宣布,簽咗費托做代言人,而佢新拍攝嘅一輯廣告硬照,露點兼勁騷腹肌,話畀大家聽男神已經返咗嚟,型呀!

由BALR初步發放嘅幾幅硬照,「王子」費托Chok晒樣擺「鋪」,又有露肉露點性感相,肯定睇到班女Fans熱血沸騰。話說BALR呢個品牌,原來同足球界都勁有淵源,話說當日3位阿積士出身嘅球星迪美迪斯奧、雲達韋爾同艾利斯就係BALR嘅創辦人,然後佢哋將BALR嘅品牌概念,透過互聯網搵到時裝發展商合作,正式開公司搞大佢。其實近幾年,包括迪馬利亞、艾斯高同比利連等,都畀人影到佢咃着過BALR呢個品牌嘅衫,睇落都好受運動型人歡迎。

為咗宣傳,費托尋日喺佢嘅IG都有發放新相,仲話自己為成為BALR團隊一份子感到非常光榮同興奮喎!老實講,以費托嘅型爆外表同個完美男神Body,新季就算坐冷板冇乜波踢都好,都唔驚搵唔到食,只要佢肯全職踩入Model界,到時一定大把世界啦!

東網體育同你追實體壇每個精彩時刻! 
http://bit.ly/2ecTF2A 


本文来源:http://hk.on.cc/hk/bkn/cnt/sport/20170616/bkn-20170616073627272-0616_00882_001.html

本文固定鏈接: http://www.makeup-time.com/15217.html
轉載請注明:Estelle 2017-06-16 09:02:07 於 綜合資訊站 發表

上一篇: :下一篇
返回頂部