【星球大戰】點罰先合理?你咁醒你判喇!

作者:Joy    發表日期:2017-07-06 16:02:02

環法尋日第4站終點前先嚟炒車,Bora–Hansgrohe王牌、單車界巨星沙根出肘,打到Team Dimension Data嘅英國車手卡維迪殊炒埋廣告板,最後證實左肩胛骨折,今屆環法提早玩完。

27歲嘅沙根事後畀賽會取消資格,呢位世界公路單車賽車手,絕對係今年衝刺王(綠色戰衣)嘅大熱門之一,咁就失去咗爭取衝刺王4連霸機會,認真可惜。

賽會喺第4站後由罰沙根總成績加30秒、衝刺積分扣80,改到罰佢DQ,手法被人批評過嚴。有人話冇咗沙根,比賽觀賞性大大降低;亦有巴打話殊哥後上揳入個窄位,畀沙根打中係意外,而且沙根事後亦已經道歉同加罰時間同扣分,賽會唔應該改判DQ。

沙根本人喺事後同記者講:「我只可以接受賽會嘅決定,但係我就唔同意佢哋嘅決定。我唔認為我做咗咩啲錯誤嘅事。」今次事件你點睇,真係一件好主觀嘅事,但係賽會如果真係認為沙根行為「危害其他車手」,應該一開始就DQ佢。

呢位斯洛伐克車神係咪故意起肘就要佢本人先知,但係單車競賽爭位從來都係好多碰撞,上年奧運港隊嘅李慧詩,都畀澳洲嘅美雅撞倒過,係意外都唔出奇。而且殊哥楔入去個時,位置已經不停收窄,中招炒車在所難免。

賽會係咪罰得過重?筆者認為確認到Peter the Great故意打人,就一定要罰DQ,但係如果未能作出有理據嘅客觀判斷,跟足規則罰加秒數同扣分已經好盡,罰DQ實在太離譜。

●佐治魯卡超


本文来源:http://hk.on.cc/hk/bkn/cnt/sport/20170706/bkn-20170706020530411-0706_00882_001.html

本文固定鏈接: http://www.makeup-time.com/17967.html
轉載請注明:Joy 2017-07-06 16:02:02 於 綜合資訊站 發表

上一篇: :下一篇
返回頂部