政Whats噏:建制派甩轆 促押後一地兩檢首讀

作者:SABRINA    發表日期:2018-07-23 10:03:17

廣深港高鐵香港西九龍站落實一地兩檢「三步走」程序已經完成第二步,至於第三步嘅香港本地立法工作,港府亦都準備得如火如荼。為咗確保高鐵香港段如期通車,政府仲由原本預計2月將相關條例草案提交立法會,早前運輸及房屋局局長陳帆仲轉口風,話最快本月底提交。不過內地省政協同樣都係本月開會,相信立法會身兼省、市政協嘅建制派議員都要離港去開政協會議。據悉建制派已促請政府唔好係月底提交條例草案,以免甩轆。

隨着全國人大常委會早前通過香港與內地簽署嘅西九龍站一地兩檢合作安排協議,落實一地兩檢「三步走」程序就只剩下第三步香港本地立法程序,政府近日已多次表明,希望喺本月底提交相關條例草案,並可以喺7月立法會暑假休會前通過。由於立法會大會下周三(17日)議程已定,所以如果政府想提交法案就只能夠喺本月24日31日。

但1月下旬亦係內地省、市政協開會時間,加上今年政協換屆,第一次會議尤其重要,新任政協更加係無理由第一次開會就「走堂」。而除咗開會,唔少省份都要求新任政協委員要喺開省政協會議前先上2至3日嘅國情班,所以都要花上幾日時間。根據過往情況,立法會建制派出任政協並唔罕見,現任工業界立法會議員吳永嘉都係其中之一,相信都會過渡至新一屆,而有傳區議會(第一)界別嘅立法會議員劉國勳等亦將喺新一屆被委任,到時佢哋離港開會,立法會建制派又少咗幾個喇。

雖知政府提交法案都要先經立法會首讀及二讀,之後再成立法案委員會,經法案委員會審議先後交回大會三讀表決。現時立法會建制派唔計主席梁君彥只得39人,如果走得4、5個去開政協會,唔止民主派玩嘢響鐘點算會議法定人數時分分鐘唔夠法定人數35人流會,就連首讀、二讀投票都隨時唔夠票甩轆,所以建制派已有聲音希望可以將提交條例草案日期延至2月。究竟建制派班長廖長江事前有冇計過呢啲日子呢?

不過,亦有建制派認為如果喺政府提交一地兩檢條例草案時流會亦無乜大不了,因為即使喺提交咗都仲要經法案委員會審議,而之後已經係農曆新年假期,所以同2月先處理分別不大,甚至有意見認為如果流會仲好,因為可以說明修改《議事規則》後民主派依然可以拉布,分分鐘仲對建制派3月立法會補選形勢有利添!


本文來源:http://hk.on.cc/hk/bkn/cnt/news/20180114/bkn-20180114222036797-0114_00822_001.html

本文固定鏈接: http://www.makeup-time.com/69464.html
轉載請註明:SABRINA 2018-07-23 10:03:17 於 綜合資訊站 發表

上一篇: :下一篇
返回頂部